Свет

Протече таен документ на холандските разузнавачи за падот на малезискиот авион

18. февруари 2020 - 14:48 | МИА

Протече таен документ на холандската воено разузнавачка и безбедносна служба за истрагата за падот на малезискиот авион на летот МН17, што беше соборен во јули 2014 година.

Досега се сметаше дека одговорноста за соборувањето на авионот, во кој загинаа сите патници и членови на екипажот, ја има Русија, бидејќи авионот беше соборен над територијата на Украина која беше под контрола на бунтовниците на кои поддршка неофицијално им даваше токму Русија.

Но, според овој документ, до падот на авионот МН17 на Malaysia Airlines дошло во областите во кои рускиот ракетен систем Бук не бил распореден во време на трагедијата.

Според документот, што им бил испратен на холандските обвинители, авионот МН17 бил надвор од досегот на сите идентификувани и оперативни украински и руски локации на кои биле распоредени системите 9К37М1 Бук М1, пренесоа руските медиуми.

Холандскиот новинар Макс ван дер Верф изјави дека неговиот главен заклучок е дека Холанѓаните имале информации за „мобилните позиции на системот Бук во текот на судирот“.

- Оваа информација не ја имавме видено претходно. И холандската војска заклучи дека нема информации за било какви ракетни системи Бук во близина на МН17, наведе тој.

Објавени се вкупно четири документи, а според извештаите за позициите на Бук-от, објавен е транскрипт од разговор меѓу германскиот независен новинар Били Сикс и австралиски полицајци.

Во текот на овој разговор Сикс споменува сведоци кои виделе украински борбени авиони на денот на несреќата. Со третиот документ се открива дека австралиските експерти, кои работеле на овој случај, анализирале редигирани слики.

Четвртиот документ претставува транскрипт од разговор меѓу холандски полицајци и неименуван очевидец, кој кажал дека видел два украински борбени авиони непосредно пред инцидентот. Неколку минути подоцна, како што навел, слушнал гласен тресок и видел како патничкиот авион паѓа.

Авионот Boeing 777 беше соборен над Доњецката област на 17 јули 2014 година на пат од Амстердам за Куала Лумпур. Притоа загинаа сите 298 патници и членови на екипажот, меѓу кои имаше државјани на 10 земји.

Коментирај