По вчерашните протести поради најавата за евентуално повторно воведување на полицискиот час во Белград и протестите што ескалираа пред зградата на Собранието, неколку политички партии попладнево организираа нов протестен собир, овојпат, пред Филозофскиот факултет.
На улиците на Белград попладнево има зголемен број поддржувачи на различни политички партии, иако Вучиќ денеска изјави дека најверојатно нема да биде воведен полициски час кој требаше да започне во петок во 18 часот и да трае до понеделник до 5 часот наутро.
Опозициската партија Сојуз за Србија бара формирање на преодна влада и нов Кризен штаб за борба против епидемијата, како и промена на врвот на полицијата по употребата на сила на синоќешниот протест во српската престолнина.
Меѓу собраните граѓани и се лидерите на опозицијата, претседателите на Партијата за слобода и правда Драган Џилас, на Народната партија, Вук Јеремиќ, на Двери, Бошко Обрадовиќ, на Демократската партија, Зоран Лутовац, и на Движењето за промени Јанко Веселиновиќ.
Бројни полициски сили распоредени околу зградата на српското Собрание
Бројни полициски сили се распоредени околу зградата на српското Собрание. Тука се поставени полицајци на коњи и со кучиња, како и неколку полициски возила, пишува N1.
Полицајците се распоредени и во близина на зградата на РТС.
Како што пренесува новинарот на Н1, граѓаните кои поминуваат покрај Собранието ги прашуваат полицајците од кого всушност ја бранат зградата.
Од насобраните има најава дека вечерва повторно ќе има протест пред српскиот Парламент, каде синоќа до доцна во ноќта имаше жестоки судири меѓу демонстрантите и полицијата.