Граѓаните во Белград вечерва се собраа пред српскиот Парламент, незадоволни од повторното воведување на полицискиот час, ги пробија вратите на Парламентот и влегоа во зградата. Според локалните медиуми, полицијата употребила сила во обидот да ги спречи.
Граѓаните извикуваа „Вучиќ крадец“, „Оставки“.
Протестот пред Собранието на Србија излезе од контрола вечерва по 22 часот, пишуваат тамошните медиуми.
Демонстрантите ја пробија заштитната ограда пред Собранието, запалија факели и се судрија со полицијата во обидот да влезат повторно во Парламентот.
Српската полиција употреби најмалку 30 солзавци во обидот да ги спречи демонстрантите да влезат внатре.
Радомир Лазовиќ од иницијативата „Да не го давиме Белград“, изјави дека причина за овој спонтан протест е акумулираното незадоволство од властите во Србија.
Голем судир се случи околу 11:30 часот кога демонстрантите фрлаа камења и факели кон полицијата, по што полицијата интервенираше со солзавец и шок бомби.
Повеќето од демонстрантите се повлекоа од платото пред зградата на Парламентот, дел се упатија кон зградата на РТС, а дел во улици зад Парламентот во обид да влезат во него. Полицијата и пред зградата на РТС фрли солзавец, а Н1 во моментов јавува дека демонстрантите повторно се враќаат кон Собранието. Новинарите од Н1 велат дека на секое доближување на демонстрантите до Собранието, полицијата веднаш фрла солзавец.
Групата демонстранти фрлаат камења и парчиња скршени сообраќајни знаци кон полицијата.
Вучиќ денеска изјави дека ситуацијата во Србија, а особено во Белград е алармантна, па затоа од овој викенд повторно ќе воведе полициски час.
Полицискиот час за жителите на Белград ќе започне во петок во 18 часот и ќе трае до понеделник до 5 часот наутро.
