В сабота на 12 ноември со почеток од 19:00 часот во Хаус оф Леџендс во Железничка станица ќе се оддржи првото издание на фестивалот Ослободуење на Скопје, каде ќе настапат скопските андерграунд легенди: No Name Nation, Fluks, Лоши Деца, Brooka band и младите PrekuRed, како и диџеј ЖолтиМан.
Бендовите од двете гаражи кои повеќе од 20 години создаваат македонска андерграунд музика ве покануваат на одлична, бескомпромисно жустра журка, каде ќе се дочека празникот 13-ти Ноември, односно дека кога македонската престонина била ослободена од фашистичката окупација во Втората светска војна.
Цената на една влезница е 250 денари, а програмата започнува од 19:00 часот и ќе трае до после полноќ. Бендовите ветуваат одлична програма исполнета со нивните најпознати песни.
„Целта е преку музика од легендите на скопскиот андерграунд звук да се ослободи Скопје од кичерајот и шундот кој го држат под окупација“, велат организаторите.
Ова е прва година на фестивалот за кој се надеваме да стане традиционален и да порасне во позната скопска приказна за урбаниот подземен звук и борба.
Сите новости и евентуални промени можете да ги следите на Facebook настанот.
