Катастрофален и понижувачки пораз ѝ нанесе минхенски Баерн на големата Барселона давајќи ѝ дури 8 голови, нешто што на Каталонците не им се случило од далечната 1946 година.
Во осминафиналето од тогашниот Копа дел Хенерал, денешен Копа дел Реј, Севиља ја понижи Барселона победувајќи ја со неверојатни 8:0 во првиот натпревар. Реваншот Барса го доби со пирови 1:0 и доживеа елиминација.
Сѐ до вчера тоа беше последен натпревар на кој Каталонците примиле толку многу голови. Сѐ додека не почна Баерн да ја полни нивната мрежа.
Забрефтаните Германци уште во 4. минута ја отворија гол-серијата со погодокот на Томас Милер на асистенција на Роберт Левандовски. Барса брзо се врати во игра, по само три минути и тоа со автоголот на Дејвид Алаба.
За ново водство на „Баварците“ се чекаше до 22. минута кога погоди Иван Перишиќ. Во 27. минута Серж Њабри и во 31. Томас Милер се погрижија Баерн да замине на пауза со висока предност од 4:1.
Луис Суарес врати некаква надеж за Барса со голот за 4:2 во 57. минута, но само 6 минути подоцна Џошуа Кимих повторно направи три гола разлика.
Во последните десетина минути германската машина продолжи да меле и да билда гол-разлика. Левандовски во 82. минута и нововлезениот Филипе Кутињо со два брзи гола во 85. и 89. минута се погрижија Барса да си замине дома понижена.
Баер е во полуфиналето каде го чека својот противник, а ќе го дознае вечерва откако Манчестер Сити и Лион ќе го одиграат својот натпревар. Другата полуфинална двојка е изненадувањето Лајпциг против претендентот ПСЖ.
