Прв пат во јавност: Шон Пен се појави со 34 години помладата партнерка

Шон Пен (64) за прв пат се појави на црвениот тепих со својата нова девојка, 34 години помладата Валерија Ников. Двојката присуствуваше на 21. издание на Меѓународниот филмски фестивал во Маракеш, Мароко.

Пен на фестивалот пристигна во класичен, елегантен црн костум, додека 30-годишната Молдавка Валерија носеше долг црн фустан без прерамки. Шон беше награден на фестивалот за неговата успешна актерска и режисерска кариера.

Ова е прв пат да се појават заедно на јавен настан, а Шон и Валерија прв пат беа поврзани во септември, кога беа снимени како се бакнуваат во Мадрид.

Тие подоцна се појавија на аеродромот во Лос Анџелес, кога повторно разменуваа нежности во јавност. Во октомври заедно отпатуваа за Париз, а двајцата беа неразделни во текот на целото патување.

Да потсетиме, Шон минатата година стави крај на врската со актерката Натали Кели. Од 2020 до 2022 година, тој беше во брак со актерката Лејла Џорџ.

Со поранешната сопруга Робин Рајт има две деца - ќерката Дилан и синот Хопер. Во доцните 80-ти беше во брак со Мадона. Неодамна во интервју за The New York Times изјави:

„Едноставно сум слободен. Ако сакам да бидам во врска, сепак ќе бидам слободен или нема да бидам во врска и нема да се повредам. Не верувам дека љубовта повторно ќе ми го скрши срцето“.

Тој исто така рече дека избегнува драма во врските и дека колешките од филмската индустрија му покажале дека врските не мора да бидат драматични или исцрпувачки.