Вчера беше претставена првата стриминг платформа на Disney, која го носи името Disney+. Таа официјално ќе почне со работа подоцна годинава, а на неа ќе бидат достапните сите содржини на Disney, Pixar, Marvel, Star Wars и National Geographic.
Disney потврди дека платформата ќе биде лансирана на 12 ноември оваа година и месечната претплата ќе чини 6,99 долари, додека годишната претплата ќе чини 69,99 долари.
Кевин Мајер, шеф на одделот за директен однос со корисници во Disney, на вчерашниот настан го покажа изгледот и содржината на платформата Disney+. Слично како кај Netflix, и корисниците на Disney+ ќе добијат препораки за гледање, а целата содржина ќе биде ставена во посебни категории, во зависност од жанрот или потеклото на истата.
Disney+ ќе биде достапна за стриминг преку телевизори, интернет пребарувачи, таблети и мобилни уреди, како и гејминг конзоли. Компанијата веќе обезбеди договори со кои стриминг платформата ќе биде достапна за конзолите на Roku и Sony.
Корисниците на Disney+ ќе имаат можност да постават индивидуални профили за луѓето со кои живеат, а платформата ќе има и родителски контроли со кои ќе може на децата да им се забрани одредена содржина. Целата содржина на Disney+ ќе биде достапна за преземање.