Стигна првиот тизер трејлер за римејкот на популарната серија „Beverly Hills 90210“ и според првичните реакции, екипата уште го има стариот шарм и хемија.
Поминаа многу години откако возбудено ја чекавме новата епизода на ТВ-серијата „Beverly Hills 90210“ секој петок, за да видиме што се случува со нашите омилени ликови од елитната населба Беверли Хилс.
Сеќавањата за серијата и 90-тите повторно се разбудија со смртта на Лук Пери, актерот кој го играше ликот на проблематичниот Дилан Мекеј. Актерот почина годинава на 52 години од мозочен удар.
19 години откако прекина симањето на оригиналната ТВ-серија што ги кршеше табуата за тоа време со обработување на теми како зависност од дрога и алкохол, развод, депресија, криминал, абортус и други чувствителни теми, оригиналната актерска постава повторно се собра, видно искористувајќи ја ретро носталгијата по 90-тите.
Бренда (Шенон Доерти), Дона (Тори Спелинг), Кели (Џени Гарт), Брендон (Џејсон Пресли), Стив (Ијан Зиринг), Дејвид (Брајан Остин Грин) и Андреа (Габриела Картерис) се дел од новата приказна во која, како што соопштуваат од Fox, епизодите ќе бидат инспирирани од животот на самите актери.
Првата епизода ќе се емитува на 7 август, па ни останува многу време за шпекулации колку време ќе ѝ треба на Шенон Доерти да си замине поради „креативни несогласувања“ и на нејзино место да дојде Тифани Амбер Тисен.