Walt Disney Studios го објави првиот тизер трејлер за новиот комичен хорор Haunted Mansion.
Во режија на наградуваниот филмаџија Џастин Симиен, филмот го краси ѕвезден ансамбл во кој се вбројуваат Лејкит Стенфилд, Тифани Хадиш, Овен Вилсон, Дени Девито, Росарио Досон, Чејс В. Дилон и Ден Леви, со Џејми Ли Кертис и Џаред Лето како The Hatbox Ghost.
Режисерот Симиен вели: „Како доживотен обожавател на атракцијата Haunted Mansion, превозбуден сум што можам да го споделам трејлерот за нашата нова филмска адаптација со неверојатна актерска екипа. Нашиот тим работеше неуморно за да создаде страшна, смешна и кинематографска авантура во која ќе уживаат и новите, и тврдокорните фанови! Едвај чекам публиката да ја доживее оваа верзија на големиот екран на легендарната атракција на Disney“.
Инспириран од класичната атракција во забавниот парк, „Haunted Mansion“ е филм за една жена и нејзиниот син кои ангажираат екипа од таканаречени спиритуални експерти за да им помогнат да го ослободат нивниот дом од натприродните натрапници. Продуценти на филмот се Ден Лин и Џонатан Ајрих, а Ник Рејнолдс и Том Пајцман служат како извршни продуценти.
Филмот ќе почне да се прикажува во кината на 28 јули.
