Полицијата во Санта Фе одржа прес-конференција во 18 часот за да извести за новите детали за убиството на Халина Хачинс на сетот на филмот „Rust“.
Ова е прва ваква конференција по трагичното убиство на снимателката.
Да потсетиме, инцидентот се случи во четвртокот попладне за време на снимањето на „Rust“ на ранчот Бонанца Крик јужно од градот Санта Фе.
Актерот Алек Болдвин смртно ја застрела директорката на фотографија Халина Хачинс и го рани режисерот Џоел Соуза додека репетирал пиштол, за кој му било кажано дека е празен реквизит и дека не е опасен.
Окружниот шериф Адам Мендоза и Мери Кармак-Алтвис, окружен обвинител во Санта Фе, им кажаа на новинарите нови официјални информации за случајот. Мендоза рече дека двајца членови на тимот, помошник-режисерот и задолжениот за оружјето, ракувале со огненото оружје пред актерот Алек Болдвин да го испука смртоносниот истрел.
„Сите три лица соработуваат во истрагата и дадоа изјави“, рече Мендоза.
„На сетот беа запленети околу 500 парчиња муниција“, рече Мендоза, додавајќи дека доказите ќе бидат доставени до ФБИ на понатамошна обработка. Тој рече дека е премногу рано да се коментираат можни обвиненија.
Мендоза рече и дека „на сетот се пронајдени и други опасни куршуми“. Тој додаде дека најверојатно истиот куршум што ја убил Хачинс завршил во Соуза.
Окружниот обвинител Мери Кармак-Алтвис истакна дека истрагата за инцидентот сè уште е во тек, но дека е подготвена да „поднесе кривична пријава“ доколку е потребно.
„Морам да нагласам дека целосната и темелна истрага е од клучно значење за нас. Ги разгледуваме фактите и доказите и ги поврзуваме со законот на Ново Мексико“, рече Кармак-Алтвис, истакнувајќи дека нејзината канцеларија „ќе се погрижи оваа истрага да биде спроведена до највисоки стандарди“.
Засега никој не е уапсен за убиството на Халин Хачинс и никој не е обвинет, пишува BBC.