Џорџа Мелони, првата жена шеф на италијанската влада, инсистира во официјалната комуникација да ѝ се обраќаат во машки род.
Во најавите се наведува дека станува збор за пораката „прес-службата на претседателот Џорџа Мелони“ или „како што изјави претседателот на Советот на министри...“, пишува италијанскиот весник La Repubblica.
На веб-страницата на италијанското Министерство за јавна администрација, објавени се извадоци од публикацијата Препораки за несексистичка употреба на италијанскиот јазик од 1987 година, во која на страница 112 пишува дека правилната употреба е „Претседател Марија Роси“, а не „ претседателката Марија Роси“. Но, во документот се наведува и дека кога има изразена желба да се користи формата од машки род, тоа не е граматичка грешка.
Во италијанскиот јазик зборот за претседател е ист, Presidente, а граматичкиот род се одредува само со членот - во машки род il, и во женски род la.
Клаудио Маразини, претседател на институцијата Accademia della Cruscaa, која се занимава исклучиво со лингвистиката и филологијата на италијанскиот јазик, од друга страна, истакнува дека женскиот род е легитимна граматичка форма, па дури и ако Мелони сака да ѝ се обраќаат во машки род, секој може да избере форма што ја преферира.
Поранешната претседателка на Претставничкиот дом, Лаура Болдрини, која се бори да се посвети поголемо внимание на положбата на жените, не е изненадена од потегот на Мелони.
„Нејзината партија се вика Италијански браќа, сè се врти околу мажите, нема вистинско признание за жените во нејзината политика, ниту со зборови ниту со дела“, изјави претставник од редовите на Демократската партија, пренесува весникот.
