Компанијата за мотоцикли Harley-Davidson веќе четири години ја разгледуваше идејата за производство на електричен мотоцикл, но вчера раководството одлучи конечно да почне со изработка на истиот.
Одборот на директори на Harley-Davidson вели дека првиот електричен мотоцикл од нивната компанија можеме да го очекуваме некаде во наредните 18 месеци.
Новиот мотоцикл веројатно ќе биде базиран нивниот прототип-модел LiveWire, кој излезе во 2014 година, но имаше многу ограничени перформанси. Овој модел би требало да биде надградена верзија на LiveWire.
LiveWire можеше да забрза од 0-100 за нешто помалку од 4 секунди, што беше импресивно во тоа време, но беше ограничен на домет од само 88 километри со едно полнење, и тоа под економично возење. Електричните мотоцикли напреднаа многу оттогаш, па се очекува дека новиот електричен модел на Harley ќе биде многу помоќен и поиздржлив.
За љубителите на брендот оваа добра вест доаѓа со пропратна лоша вест. Имено, компанијата забележува пад во последните неколку години и продажбата на мотоцикли лани падна за 6,7% во однос на претходната година, и продолжува со опаѓање во 2018 година.
