Еден од најатрактивните новитети од автомобилскиот свет се прошета низ Монако. Најновата реинкарнација на серијата 8, која во крајот на минатиот век ја претставуваше највисоката класа на баварскиот гигант, сега повторно се појавува во улога на луксузно купе.
BMW M850i е последниот во низата елитни и престижни автомобили од германската компанија, и тој се заканува дека ќе биде огромен хит кај сите они што можат да си го дозволат.
Ова атрактивно купе има 538 коњски сили и вртежен момент од 750 Nm, а V8 битурбо моторот од 4.400 кубици со xDrive погон и осумстепен автоматски менувач дополнително ќе го засили аргументот за купување на M850i.
Максималната брзина од 250 км/ч, како и забрзувањето од 0-100 км/ч за 3,7 секунди не звучат импресивно, но тоа и не е така голем проблем за едно луксузно купе чија примарна грижа не е брзината, туку удобноста, возачкото искуство и луксузот.
Продажбата на BMW M850i започнува во ноември по цена од 125.700 евра. Постои и дизел верзија на моделот, наречена 840d, која има 3.0 мотор со 320 коњски сили и 680 Nm, а која е значително поевтина и ќе се продава по почетна цена од 100.000 евра.