Базиран на платформата Lotus EPA (Electric Premium Architecture), теренецот Eletre со електричен погон во својата премиерна претпродукциска верзија има нешто повеќе од 600 коњски сили.
Конечно пристигна долгонајавуваниот SUV на Lotus, а британската автомобилска компанија, која со децении инсистира на најдобар можен сооднос тежина/моќ, напомена дека електричниот Eletre ќе го задржи духот на автомобилот чиј татко е легендарниот Колин Чепмен.
Засега е познато дека Eletre ќе го придвижуваат два електромотори кои ќе произведуваат комбинација од нешто повеќе од 600 коњски сили, а првиот теренец Lotus со интегриран погон и адаптивна воздушна суспензија од 0 до 100 км/ч пристигнува за помалку од три секунди и развива 260 км/ч.
Податоците за масата не беа откриени, но беше откриено дека батериите со капацитет од околу 100 kWh со едно полнење обезбедуваат досег од околу 600 километри (според стандардите WLTP), а полнењето на брзи полначи обезбедува 400 километри за 20 минути.
Со каросерија што во неколку детали потсетува на двоседот Emira, Lotus ќе го произведува Eletre во своите нови кинески производствени погони во Вухан, а првите испораки на клиентите во Кина и Европа се планирани за првата половина на 2023 година.
