Во пресрет на 21. OFFest што ќе се одржи од 1 до 4 јуни, Скопскиот џез фестивал ја најави промоцијата на новото издание на SJF Records - првата дискографска објава на Бранислав Николов под уметничкото име Пијан Славеј, вечерва од 20 часот во Makka Bar.
Деби изданието на Пијан Славеј се состои од 5 композиции, со вкупно времетраење од 18 минути. Херметички затворена, концизна, модернистички романтична музичка приказна што задолжително ќе се врти на repeat и ќе биде сè што ни треба ова лето.
Автор на текстовите и музичката скица е Пијан Славеј (Николов), а аранжманите и музиката во поширок контекст се дело на групата. На ова исклучително EP гостуваат: Сара Мејс (харфа), Петар Христов (кларинет) и Никола Ристановски (глас). Песните се снимени, миксани и продуцирани од Ивица Јанкуловски во скопското студио „Алшар“. Дизајнот на омотот е на Александар Поповски - Цанче. Извршен продуцент на изданието е Оливер Белопета.
„Изворната идеја на овој акт беше да се свири поконкретна музика со поетски сензибилитет на една нова македонска шансона. А потоа, тоа стана импулс за послободна и поширока групна интерпретација, градба и наслојување. Сега сè повеќе доаѓа до израз развивањето на инструменталното ткиво врз зборовната коскеност.
Од нежен ламент до крик - чувството на изолираност и загуба како нов духовен пејзаж, но и потребата од вистинскиот уметничи допир и преживување, се суштинскиот драјв на оваа музичка експресија што постојано се трансформира во потрага по сопствен природен глас“, вели Николов.
Покрај физичкото компакт-диск издание, Pijan Slavej EP ќе биде достапно и на сите популарни глобални дигитални платформи и стриминг сервиси (Bandcamp, Spotify, Deezer, Apple Music, Youtube, Tidal...)
Покрај Николов (глас, мини електрично пијано), за музиката се задолжени: Пеце Трајковаки-Брада (дигитален акордеон, ел. гитара, синт, програминг), Анреа Мирческа (контрабас), Мартин Џорлев (клавијатури) и Мартина Баракоска (тапани).
„Еве нешто што претендира да биде албум на годината и тоа со полно право“, со задоволство констатираше музичкиот новинар Ненад Георгиевски.