Првото Светско првенство за женски клубови ќе се одржи во јануари и февруари 2026 година, одлучи денеска ФИФА.
Светско клупско првенство за фудбалерки ќе се одржува на секои 4 години, а на него ќе учествуваат 16 клубови. ФИФА сѐ уште нема донесено одлука околу тоа која земја ќе биде домаќин на ова прво историско натпреварување. Со оглед на терминот, не се очекува тоа да биде европска земја.
Оваа идеја на ФИФА е уште од декември 2022 година кога светската куќа на фудбалот најави дека ќе покрене иницијатива за одржување на Светско клупско првенство и за фудбалерки.
На денешниот 74. конгрес во Бангкок, главниот град на Тајланд, оваа одлука беше официјализирана, па така по Светското клупско првенство за фудбалери ќе имаме и паралелно натпреварување за фудбалерки, со таа разлика што жените прв пат добиваат можност за ваков турнир, додека мажите досега секоја година имаа мини првенство, а наредната за прв пат ова натпреварување ќе стартува со нов, проширен формат и ќе се игра на секои 4 години.
