Пандемијата на COVID-19 е во полн ек ширум светот и различни земји имаат воведено различни нивоа на мерки за заштита.
Генералните препораки се да се одржува дистанца од најмалку 1,5 метар и често да се мијат рацете, како и да се носат маски кога не може да се одржи потребната дистанца.
Но, не сите луѓе ги прифаќаат и почитуваат мерките.
Најнови истражувања открија дека луѓето со „мрачни“ карактерни особини, како психопати и нарцисоидни луѓе, помалку е веројатно дека ќе се придржуваат до мерките и ќе помогнат во напорите да се спречи ширењето на коронавирусот.
Исто така поголема е веројатноста дека овие луѓе ќе прават непотребно големи лични резерви на храна и тоалетна хартија.
Две нови истражувања објавени во стручното списание Personality and Individual Differences ги потврдуваат претходните откритија дека „мрачната тријада“ – нарцисоидност, психопатија и макијавелизам – се поврзани со игнорирањето на превентивните мерки против COVID-19.
Во тек се повеќе истражувања чија цел е да се детектира што е тоа што ги поттикнува луѓето да не ги почитуваат мерките за заштита во време на пандемија.
„Нашата лабораторија се интересира како карактерните особини како фактор се поврзани со начинот на кој луѓето функционираат, вклучувајќи ги субјективната добросостојба и менталното здравје“, вели Магдалена Земојтел-Пјотровска од Институтот за психологија при Универзитетот во Варшава.
