ПСЖ го здроби Реал Мадрид во дербито, но победата на денот ја зграпчи загрепски Динамо кој беше најубедлив против дебитантот Аталанта.
Парискиот тим и без триото Нејмар, Кавани и Мбапе немаше проблеми со неинвентивниот Реал. Двата гола на Анхел Ди Марија и оној на Тома Менје го потопија Кралскиот клуб за одличен старт на сезоната.
Баерн прокнижа планирани 3 бода против Црвена звезда со головите на Кингсли Коман, Роберт Левандовски и Томас Милер.
Со истиот резултат Мначестер Сити славеше на гостувањето во Харкив кај Шахтар. Ријад Махрез, Илкај Ѓундоан и Габриел Жезус беа творци на победата на „граѓаните“.
Но, најубедливата победа синоќа се случи на „Максимир“ во Загреб каде Динамо неочекувано лесно триумфираше над дебитантот Аталанта. Бекот Марин Леовац го отвори резултатот, а потоа следуваше хет-трик на Мислав Оршиќ за права бламажа на дебито на полуларната „Деа“.
Дерби се играше и во Мадрид каде Јувентус испушти водство од 2:0 против Атлетико. Јуан Куадрадо и Блеза Матуиди досеа водство на почетокот од второто полувреме, но прво Стефан Савиќ намали, а во 90-та Ектор Ерера донесе бод за домаќините.
Изненадување во Леверкузен приреди московски Локомотив кој со 2:1 го победи Баер. Гжегож Криховјак го отвори резултатот, домаќинот израмно со несреќен автогол на Бенедикт Хеведес, а Дмитриј Баринов ја донесе големата победа.
Како Јуве, Тотенхем исто така испушти водство од 2:0 на гостувањето кај Олимпијакос. Хари Кејн и Лукас Моура за само четири минути најавија победа, но Даниел Поденсе и Матје Валбуена од пенал донесоа бод за Грците.
Единствениот натпревар кој заврши со најнепопуларниот резултат се одигра во Бриж каде гостуваше Галатасарај.