Маурисио Почетино повеќе не е тренер на Пари Сен-Жермен. Парискиот клуб за ова денес преку соопштение ја информира јавноста.
„Нашиот клуб потврдува дека го завршивме нашето партнерство со Почетино. Им благодариме на Маурисио и на неговиот стручен штаб за нивната работа и им посакуваме сѐ најдобро“, се вели во соопштението на парижаните.
Почетино официјално го презеде ПСЖ во јануари 2021 година и на лето го продолжи договорот до 2023 година.
Педесетгодишниот Аргентинец со клубот го освои Купот и Суперкупот на Франција, како и шампионската титула оваа сезона. Во 1/8-финалето на Лига на шампиони изминатава сезона ПСЖ загуби од Реал Мадрид (1:0, 1:3).
Се очекува денес ПСЖ да одржи прес-конференција, на која со голема веројатност ќе биде објавено именувањето на Кристоф Галтје за нов предводник на тимот. Тој во Париз доаѓа од клупата на Ница.