„Светците“ и „Кнезовите“ потсетија на некои дамнешни времиња кога двата тима се бореа за титулата откако синоќа одиграа возбудливо реми со шест голови.
Убавиот натпревар го отвори Нејмар уште во 3-тата минута, но само четири минути подоцна Монако израмни преку Желсон Мартинш.
Во 13-тата се случи првиот пресврт откако Висам Бен Једер донесе водство за гостите од Кнежеството.
Несреќен во 24-тата минута беше гостинскиот дефанзивец Фоде Бало-Туре од чија нога топката по удар на Нејмар драстично го смени правецот и заврши во мрежата за 2:2.
На три минути пред паузата Нејмар донесе нов пресврт и сега водство на ПСЖ од 3:2.
Вториот дел не беше ефикасен како првиот. Ислам Слимани во 70-тата минута израмни на 3:3 што на крајот се покажа како конечен резултат.
Монако може да жали што не постиогна некој гол бидејќи имаше две колосални шанси. Прво Кеита Балде еден на еден не успеа да го совлада Кејлор Навас, а потоа Камил Глик во глава ја погоди стативата.
Со ова реми ПСЖ ја прекина серијата од 6 победи во низа, но и натаму е прв со 46 бодови, 5 повеќе од второпласираниот Марсеј кој има и натпревар повеќе. Монако е осми со 29 бодови.