Екипата на ПСЖ продолжува да го засилува својот тим за следната сезона. Новиот француски шампион ќе го донесе Витиња од Порто, за кого ќе плати отштета од 40 милиони евра.
Се наведува дека клубот од Париз во петокот ги договорил сите услови со Порто и дека понудата конечно била прифатена и најверојатно се ќе биде комплетирано до крајот на оваа недела кога и официјално треба да биде објавен трансферот.
Пари Сен-Жермен на португалскиот шампион ќе му уплати 40 милиони евра, што е втора голема зделка на овој тим во последните неколку дена. Потсетуваме, претходно Порто, исто така за 40 милиони евра, го продаде играчот од средниот ред Фабиу Виера на Арсенал и така за само неколку дена заработи 80 милиони евра.
Претходно ПСЖ обезбеди откуп на договорот на Нуну Мендеш од Спортинг, исто така за приближно 40 милиони евра, или поточно за 38 милиони.
Витур Машаду Ферејра, попознат по прекарот Витиња, се врати од Вулверхемптон во Порто на почетокот на минатата сезона бидејќи англискиот клуб не сакаше да плати 20 милиони евра за неговите услуги, а за Порто испадна и тоа како подобро бидејќи само една година подоцна го продадоа за 40 милиони евра.
Ова е и прв потпис на новиот клупски советник Луиш Кампуш кој дојде како главен спортски консултант, а се наведува дека овој играч бил еден од неговите приоритети.
Минатата сезона 22-годишниот Витиња одигра вкупно 47 натпревари за Порто, постигна 4 гола и додаде 5 асистенции. Има и 3 настапи за репрезентацијата на Португалија за која дебитираше годинава.
