Годинешните MTV Video Music Awards ја враќаат традиционалната церемонија на доделување на наградите во живо, што ќе се одржи на 12 септември во арената „Барклејс Сентр“ во Њујорк, откако минатогодишното издание се одржа во форма на хибридна програма на повеќе локации со малку или без публика.
Изведувачите сè уште не се откриени, но според најавата, церемонијата која ќе се емитува во повеќе од 175 земји, „ќе ги претстави настапите на некои од најголемите музички ѕвезди и ќе го прослави враќањето на забавата во живо“.
Одбележувајќи ја 20-годишнината од терористичкиот напад на 11 септември, MTV соработува со организацијата на „11 септември“ за низа активности кои ќе се одржат во текот на неделата што ќе му ретходи на доделувањето. MTV ќе организира разни настани со членовите на заедницата „11 септември“, која постои уште од „Концертот за Њујорк“ од 2001 година, во чест на жртвите, нивните семејства, како и на повредените во нападот.
Деталите за изведувачите и водителите ќе бидат објавени блиску до датумот на одржување на настанот.
Минатогодишното доделување на наградите, чиј домаќин беше Кеке Палмер, се одржа на повеќе локации низ градот Њујорк, речиси без присуство на публика. Вкупно 6,4 милиони луѓе го гледале доделувањето преку малите екрани, а според објавеното, MTV собрал 41,1 милиони интеракции на социјалните мрежи.
На церемонијата во 2020 година настапија „BTS“, „The Black Eyed Peas“, ДаБејби, „The Weeknd“, Дожа Кет, Малума со бендот „CNCO“ и Ариана Гранде.
Лејди Гага однесе пет награди, вклучувајќи ја и првата награда Tricon, која се доделува како признание на уметникот кој постигнал најдобри резултати во три или повеќе дисциплини.
„BTS“, Тејлор Свифт, Дожа Кет, Меган Ти Сталион и „Blackpink“ исто така беа големи победници, а беа воведени две нови категории специфични за карантин: наградата за најдобро ново музичко видео снимено дома, која ја освоија Ариана Гранде и Џастин Бибер за „Stuck With U“, како и за најдобра изведба во карантин, освоена од групата „CNCO“.
