Свет

Пулицерова награда што никој не би ја посакал

16. април 2019 - 10:28 | А.С.

Новинари на локален американски весник ја добија Пулицеровата награда за текст за масакрот што се случи токму во нивната редакција.

Но, во просториите на Capital Gazette во Мериленд немаше прослава по повод добивањето на најпрестижната новинарска награда во САД.

Новинарите тивко се прегрнаа во знак на сеќавање и почит кон петте колеги кои беа убиени кога вооружен напаѓач влета во нивната редакција во јуни, 2018 година.

Пулицеровата награда ја добија и редакциите на New York Times и на Wall Street Journal за нивното истражувачко новинарство за американскиот претседател Доналд Трамп.

Новинарите на Capital Gazette ја добија специјалната Пулицерова награда за покривање настан и покажана храброст соочени со еден од најкрвавите напади на новинари во американската историја.

Одборот што ја доделува Пулицеровата награда доделува и грант од 100.000 долари за новинарите во весникот.

Вработените во Capital Gazette Џон Мекнамара, Венди Винтерс, Ребека Смит, Џералд Фишман и Роб Хијасен починаа во нападот лани во јуни.

Остатокот од редакцијата сепак наредниот ден објави број во кој го опиша масакрот.

За нападот е обвинет маж кој долго време имал проблем со политиката на весникот. Тој лани пред судот се изјасни за невин по обвинението.

Коментирај