Од денеска се пуштени во продажба билетите за натпреварот што македонските ракометари ќе го одиграат против Португалија, в четврток во Скопје, во рамки на квалификациите за пласман на Европското првенство 2024.
– Продажбата на влезници започна точно напладне онлајн на интернет страницата на МК Тикетс, а билети можат да се купат и на сите продажни места на МК Тикетс низ државава, соопшти Ракометната федерација на Македонија.
Продажната цена на влезниците за натпреварот в четврток од 19 часот во СРЦ „Борис Трајковски“ е 100 и 200 денари.
По две одиграни кола во групата 1, Македонија и Португалија се на делба на првото место со максимални 6 бодови, додека Луксембург и Турција се без бодови.
