„Вакцинацијата е доброволна работа, секој одлучува за себе. Јас одлучив дека денеска ќе се вакцинирам“, изјави рускиот претседател Владимир Путин.
Денеска се очекува Путин да прими една од трите достапни руски вакцини против COVID-19, иако од Кремљ не објавија со која вакцина ќе биде вакциниран рускиот лидер. Само известија дека тоа нема да го направи јавно пред камери, како некои негови колеги.
Не се знае дали е во прашање најпопуларната руска вакцина Sputnik V или некоја од другите две, кои се помалку познати но исто така ефикасни – EpiVacCorona, произведена во новосибирската лабораторија Vector или CoviVac од лабораторијата на Руската академија на науките.
За потсетување, руските медиуми во август известија дека една од ќерките на Путин доброволно се вакцинираше со Sputnik V.
Оваа вакцина инаку веќе е продадена во 55 земји, а во 10 ќе се произведува. Индија ќе биде прва од тие земји кои ќе почнат со производство на руската вакцина.
„Намерно не откриваме со која вакцина претседателот ќе се вакцинира, сите три руски вакцини се ефективни и безбедни“, соопшти Дмитриј Песков пред новинарите, пренесе Reuters.
Тој објасни дека на Путин не му се допаѓа идејата да биде вакциниран пред камери.
