Рускиот претседател Владимир Путин ги отфрли шпекулациите дека спортистите од неговата земја користеле допинг спонзориран од државата.
Денешната изјава на Путин следи по барањето на Националните анти-допинг сојузи (NADOs) сите руски спортисти да добијат општа забрана за учество на сите натпреварувања се додека Русија не постави правилен анти-допинг систем.
„Никогаш не сме спонзорирале допинг програма и се надевам дека нема ни во иднина. Ние ќе се бориме против допингот“, изјави Путин.
Рускиот претседател признава дека постоел индивидуален допинг на руските спортисти во минатото и дека допинг системот во државата не бил на потребното ниво.
„Ќе поставиме нов систем кој ќе функционира“, порача Путин.
Непосредно пред одржувањето на Олимписките игри во Рио де Жанеиро мината година, Светската анти-допинг агенција (WADA) побара од Меѓународниот олимписки комитет (МОК) да ја суспендира Русија, но барањето беше одбиено, односно МОК им препорача на спортските организации сами да решаваат за казните.
Настап на Игрите во Бразил им беше забранет на руските атлетичари и параолимпијците, а подоцна неколкумина руски освојувачи на медали од разни натпреварувања беа суспендирани, а нивните резултати поништени.