Рускиот претседател Владимир Путин откри дека негови фаворити за освојување на Светското првенство во фудбал, кое почнува на 14 јуни во Русија, се репрезентациите на Аргентина, Бразил, Германија и Шпанија.
„Кој ќе ја освои титулата? Тоа е тешко прашање. Има многу добро репрезентации. Тука се и јужноамериканските тимови Аргентина и Бразил. На последното првенство Германија играше одлично, а Шпанија е преубав фудбалски бренд. Сигурно ќе има и други кандидати, но само најдобриот ќе победи“, изјави Путин за кинеските медиуми воочи посетата на Кина.
Рускиот претседател ја коментираше и лошата форма на репрезентацијата на Русија, која не знае за победа веќе седум натпревари во низа.
„За жал нашата репрезентација во последно време не бележи добри резултати. Но, навивачите и љубителите на фудбалот во Русија се надеваат дека репрезентацијата добро ќе се покаже, поточно дека ќе игра еден модерен, интересен и убав фудбал и дека ќе се бори до крај“, вели Путин.
Домаќинот Русија ќе го отвори Светското првенство на 14 јуни со натпреварот против Саудиска Арабија, првиот противник од групата А, во која се уште и репрезентациите на Египет и Уругвај.
