Рускиот претседател Владимир Путин објави дека е регистрирана првата руска вакцина за коронавирус. Станува збор за вакцина заеднички развиена од Институтот Гамалеја и руското Министерство за одбрана.
Клиничките испитувања започнаа на 18 јуни и сите 38 волонтери развија имунитет. Со ова Русија стана првата земја во светот која регистрира вакцина за коронавирусот, објави Путин.
На состанокот на владата тој објави дека една од неговите ќерки примила од вакцината.
„Во таа смисла, мојата ќерка учествуваше во овој експеримент. По првата доза вакцина доби температура од 38 степени Целзиусови, додека наредните денови спадна на 37“, рече Путин.
По втората доза вакцина нејзината температура малку се зголемила, а потоа сè било во ред. Таа се чувствува добро и нејзините антитела се на високо ниво, објасни Путин.
Путин го замоли министерот за здравство Михаил Мурашко да го известува за вакцината. Тој рече дека вакцината е ефикасна и формира стабилен имунитет.
Путин им се заблагодари на сите кои беа ангажирани во создавањето на првата вакцина против коронавирусот, нарекувајќи го тоа како многу важен чекор за светот.
