Рускиот претседател Владимир Путин изјави дека ја примил втората доза на вакцина против COVID-19 и ги охрабри Русите да го следат неговиот пример.
„Сакам да ве известам дека пред да влезам во оваа просторија, јас ја примив втората доза на вакцина. Се надевам дека и вие, грижејќи се за вас и вашите најблиски, ќе го направите истото и ќе го следите мојот пример“, изјави Путин во телевизиско емитување.
Не е познато со која од трите руски вакцини се вакцинираше 68-годишниот Путин, ниту се откриени повеќе детали за неговото вакцинирање.
Минатиот месец, на 23 март претседателот ја прими првата доза на вакцина без да открие за која од трите вакцини – Sputnik V, EpiVacCorona или CoviVac - станува збор.
Многу Руси се скептични за вакцинацијата, а според скорешна анкета помалку од третина би се вакцинирале. Од земја со 144 милиони луѓе првата доза ја примиле 6.3 милиони луѓе до март.
Околу 3.5 милиони Руси ги имаат примено двете дози на Sputnik V до 15 март. Масовната вакцинација во земјата почна на 18 јануари.