Владимир Путин, на денешниот состанок со претставници на студенти, изјави дека луксузната палата за која Алексеј Навални тврди дека му припаѓа на рускиот претседател, всушност не е негова.
Во текот на разговорот, Путин изјави дека шпекулациите кои кружат по објавеното видео служат за перење на мозокот на рускиот народ.
„Не сум го гледал видеото, едноставно немам време за тие работи. Но, ги прегледав исечоците кои ми ги донесоа моите помошници. Ништо од наведеното како моја сопственост не ми припаѓа мене, ниту на моето семејство“, вели Путин.
Во текот на состанокот, Путин ја искористи приликата на студентите да им објасни дека имот од каков бил вид мора да има одредена документација.
„Овие информации кружат на интернет повеќе од 10 години, а сега е искористена можноста за граѓаните на Русија да се насочат против претседателот. Имот од ваков вид мора да има соодветна документација и податоци за финансиски трансакции. Мора да постојат и докази во нотарски книги во електронски облик“, рече Путин и нагласи дека фотографиите во снимката се класичен пример на фотомонтажа.
Во видеоснимката во одредени делови се појавуваат и луѓе кои ги потврдуваат наводите дека тоа е палатата на Путин или се дел од истрага што Навални ја покрена против Путин.
„Познавам некои од луѓето кои се појавија во видеото, некои од нив се стари пријатели или поранешни колеги, далечни роднини и познаници. Меѓутоа, видов и луѓе кои воопшто не ги познавам, ниту претходно сум ги видел“, изјави Путин на состанокот.
Досега видеото од луксузната палата има над 88 милиони прегледи.