Рускиот претседател Владимир Путин му честиташе на Данил Медведев за триумфот над Новак Ѓоковиќ во финалето на УС Опен, каде Русинот ја освои првата Грен слем титула во кариерата.
Рускиот тенисер неочекувано лесно победи во три сета, 6:4, 6:4, 6:4, по само 136 минути игра, а Путин истакна дека Ѓоковиќ едноставно немал шанса покрај расположениот Медведев.
„На патот до финалето на ова престижно натпреварување, покажавте највисоко ниво на вештина и трпеливост во постигнувањето на вашите цели, а во решавачкиот натпревар одигравте на сигурен и смирен начин, не оставајќи му никаква шанса на вашиот силен и реномиран противник. Така играат вистинските шампиони!“, стои пораката потпишана од Путин и објавена од руски Кремљ.
Медведев му се реваншираше на Ѓоковиќ за поразот во финалето на Австралија опен, со што стигна до својот прв Грен слем трофеј во кариерата.
Тој, исто така, стана првиот руски тенисер по Марат Сафин кој победил на Грен слем турнир. Сафин победи на Австралија опен во 2005 година.