Претседателот на Русија, Владимир Путин ги објави податоците за откривање странски агенти на руска територија во текот на изминатите 12 месеци, пренесува BBC.
Руските специјални служби минатата година откриле неколку стотина шпиони кои работат во служба на странски држави.
„Благодарение на успешните специјални операции, во текот на 2018 година запрени се активностите на 129 кадри и 465 странски агенти“, изјави Путин во обраќањето на претставниците на Федералната служба за безбедност (ФСБ), наследничка на некогашното КГБ.
Путин додаде дека странските известувачки служби тежнеат кон засилување на својата активност на руска територија и настојуваат со сите средства да добијат информации поврзани за политика, економија, наука и технологија.
Рускиот претседател го критикуваше интензитетот на активности на странски агенти додека западните земји сметаат дека токму Русија е вмешана во неколку шпионски скандали. Меѓу тие скандали е и аферата со труењето на двојниот шпион Сергеј Скрипал и неговата ќерка Јулија, минатата година во Велика Британија. Властите во Лондон ја обвинија Москва, која демантираше вмешаност во неколку наврати.
