За време на своето годишно обраќање кое Путин го одржа денеска, доби прашање од рускиот рокер Сергеј Шнуров, кој сега е политичар, да каже зошто руските хакери повторно не му помогнале на Доналд Трамп да победи на претседателските избори во САД.
„Па тоа не е ни прашање, туку провокација. Руски хакери не му помогнаа на Трамп да победи. Тие не се мешаа во американските избори. Сѐ тоа се шпекулации со цел да се затегнат односите помеѓу нашите две држави. Се надевам дека сите тие проблеми, или барем дел од нив, ќе се решат со новата администрација. Новиот претседател е искусен политичар и се надевам ќе ни помогне да ги расчистиме тие работи“, одговори рускиот претседател.
Уште кога Трамп извојува победа на претходните претседателски избори веднаш се проширија куп гласини дека победил благодарение на интервенција на руските сајбер експерти кои ги минирале изборите.
Потоа се осврна и на годинашните избори на кои победи Џо Бајден.
„Речиси 50 проценти од граѓаните гласаа за Трамп. Тоа значи дека тој има голема поддршка во САД. А тој, како што изгледа, не сака да ја уништи сопствената држава“, додаде Путин.
