И покрај претрпените загуби, руската владеачка партија Единствена Русија, постигна јасна победа на парламентарните избори во Русија.
По пребројувањето на сите гласачки ливчиња, партијата освои 49,8% од гласовите, соопшти денеска во Москва руската Централна изборна комисија.
Комунистите се втори со освоени 18,9% од гласовите, десните популисти на Либерално-демократската партија на Русија (ЛДПР) на ултра-националистот Владимир Жириновски освоија 7,5%, а партијата Правична Русија има 7,4%.
Новата руска партија Нови луѓе, исто така, го надмина цензусот од 5% и во својот прв обид успеа да влезе во парламентот со поддршка од 5,3% од гласовите.
Владеачката партија претрпе загуби во споредба со минатите избори од пред пет години. Во тоа време Единствена Русија освои 54,2% од гласовите. Комунистите остварија значителни придобивки откако пред пет годинии имаа само 13,35%, пренесува DPA.
Сите партии застапени во новата Државна Дума се сметаат за блиски до Кремљ.
ЦИК не ги прими кандидатурите на опозицијата, предводени од затворениот Алексеј Навални. Неговиот тим зборуваше за масовна изборна измама, а независните набљудувачи наведоа илјадници прекршувања на изборниот процес.
