Фудбалските клубови Работнички и Ренова добија нови имиња на тренерските позиции.
Искусниот македонски фудбалски стручњак Никола Илиевски е нов тренер на Ренова.
Илиевски во клубот доаѓа откако Јетон Беќири си поднесе оставка кон крајот на минатиот месец.
Во меѓувреме тимот го водеше спортскиот директор Лирим Саити и оствари добар успех, реализираше победи против Академија Пандев и Шкупи, а на последниот натпревар ремизираше со Шкендија.
Ренова во моментов е на четвртото место на табелата, а Илиевски ќе дебитира на 21-ви овој месец на домашен терен против Работнички.
Работнички пак, го назначи Жикица Тасевски за нов шеф на стручниот штаб. Тој доаѓа на местото на Ѓоре Јовановски, кој спогодбено го раскина договорот со клубот по серијата слаби резултати.
- Постигнавме договор со Жикица Тасевски за соработка до крајот на сезоната. Тој е млад, амбициозен и веќе докажен стратег, кој има одлично познавање на Првата фудбалска лига, а исто така и интернационално искуство. Доаѓа во стара, добро позната средина и очекуваме дека ќе успее да го воздигне тимот на едно повисоко ниво. Очекуваме оваа промена на тренерската позиција да биде дополнителен импулс и за фудбалерите и Работнички да се врати на позициите кои му припаѓаат, изјави претседателот на клубот, Драган Поповски.
Тасевски ќе го води тимот до крајот на актуелната сезона, со опција за продолжување на соработката и за подолг период доколку се задоволни двете страни.
