Најдобриот играч на Работнички во првиот дел од сезоната, напаѓачот Али Регба, кариерата ќе ја продолжи во словенечки Марибор.
Марибор ја доби трката со ТСЦ од Бачка Топола за потписот на ирскиот крилен напаѓач. Српскиот клуб на Работнички му понудил 50.000 евра, а Марибор трипати поголема сума. Претходно за неговите услуги во игра беше и шведски АИК.
Регба е меѓу најзаслужните за добрите резултати на Работнички во есенскиот дел од сезоната, постигнувајќи 7 голови и 5 асистенции.
Регба во Работнички пристигна минатиот февруари. Роден е во Германија од татко Алжирец и мајка Иркинка. Има 19 настапи за У19 репрезентацијата на Ирска.
Заминувањето на Регба е голем удар за Работнички пред почетокот на пролетниот дел од сезоната. Клубот од Дебар Маало е на делба на првата позиција заедно со Силекс и Шкендија.
