Фудбалскиот прволигаш од Дебар Маало во своите редови го донесе долгогодишниот мотор на тетовска Шкендија, Арменд Алими.
Без да открие детали од договорот, Работнички само објави дека 34-годишниот офанзивец од средниот ред е нов член на клубот.
Кумановецот 6 и пол сезони го носеше црвено-црниот дрес на Шкендија со која освои 3 титули во лигата и 2 во купот, а во сезоната 2018/19 ја носеше и капитенската лента. Со Шкендија се раздели на 18 декември, откако не настапи на последните 6 натпревари во Првата лига. За тетовскиот клуб одигра вкупно 241 натпревар на кои постигна 42 гола и запиша 46 асистенции.
Алими кариерата ја почна во Башкими од родниот Куманово, од каде се пресели во локалниот ривал Милано. Потоа замина на печалба носејќи ги дресовите на Истра (Хрватска), Еребро (Шведска), Неа Саламис и Ермис (Кипар).
За репрезентацијата на Македонија има 13 настапи, но последен пат во 2016 година.
