Седум работници загинаа во пожар што избувнал и брзо се раширил во текстилна фабрика во Индија, каде имало само еден излез од зградата до кој се стигнувало само со скала.
Во фабриката Nandan Denim во предградие на Ахмедабад, покраината Гуџарат, се шијат главно фармерки за 20-тина познати светски брендови како Target, Ann Taylor, Mango и Wrangler, а сестринската компанија на оваа фабрика снабдува брендови како Walmart и H&M.
Некои од американските и мултинационалните компании наведени на веб-страницата на фабриката излегоа со соопштенија дека не се „клиенти“ и инсистираат дека „ги осудуваат опасните услови за работа“ во ваквите фабрики.
Nandan Denim е еден од најголемите снабдувачи со производи од тексас во светот.
Од Противпожарната служба соопштија дека во фабриката на два ката имало само една врата за излез за работниците до која можело да се стигне само со качување по стрмна скала, што значи дека на работниците заробени внатре им била отежната можноста да излезат.
Полициската истрага покажа дека фабриката кршела бројни правила за работење и безбедност при работа. Nandan Denim во моментов има забрана за работење, а управата вети дека ќе им исплати по 14.000 долари на семејствата на загинатите.
Ужасни услови за работа
Работниците кои го преживеаја пожарот велат дека работат во ужасни услови, но бараат да останат анонимни во медиумските објави за инцидентот.
Работат за плата од 35 центи на час, речиси 14 часа на ден, но велат дека немаат друг избор.
„Одвреме-навреме ќе се случи пожар во некоја фабрика. На никого не му е гајле, а ние си продолжуваме со работа, без да се подобрат условите“, вели еден работник.
Вработените, од кои повеќето се жени, велат дека им се наметнува невозможна норма, како шиење 400 парчиња на ден. Повеќето од нив работат во натрупан простор, најчесто без пауза за јадење или одење во веце.
Во декември минатата година, во пожар во фабрика за производство на чанти, капи и други модни додатоци во Њу Делхи загинаа 43 работници.