Владата на Република Северна Македонија сѐ уште не ја напуштила предизборната реторика. Нека се вратат на реализмот.
Ова им го порача на новинарите бугарскиот претседател Румен Радев, неколку часа пред средбата со претседателката на Гордана Силјановска-Давкова, која доаѓа во Софија на оперската продукција „Набуко“, јавува БГНЕС.
„Точно е дека музиката и културата сe сфери кои нѐ зближуваат и Бугарија отсекогаш била отворена за дијалог со Република Северна Македонија и очекува овој дијалог не само да помогне во нашето културно зближување, да даде поттик на економската соработка, очекуваме со овoj дијалог конечно решавање на отворените прашања меѓу нас“, рече Радев.
Тој нагласи дека заедно со потпишаните договори, вклучувањето на раководството на Македонија во Коридорот 8 ќе биде јасен показател за реалните европски амбиции на Македонија за поголема поврзаност во регионот.
„Очекувам искажаната желба за дијалог и разбирање од страна на претседателката Сиљановска да стане конзистентна политика и на Владата на Северна Македонија“, рече Радев и продолжи:
„Владата на Северна Македонија сѐ уште не ја напуштила предизборната реторика. Нека се вратат на реализмот. Нашите односи ќе се засноваат на склучените договори. Очекуваме Северна Македонија да ги исполни сите свои обврски – и кон нас и кон Европската Унија“.
„Строго го следиме протоколот, на ред сум да дојдам во официјална посета на Северна Македонија“, рече Радев во врска со денешната посета на Силјановска-Давкова, која е неофицијална, пренесува медиумот.
Запрашан дали веќе има ваква покана, Радев рече дека ова прашање ќе биде разјаснето со шефот на македонската држава.
