Бугарскиот претседател Румен Радев одговори на барањето за извинување, што македонскиот претседател Стево Пендаровски го упати до бугарскиот врв поради улогата на бугарската војска и полиција во елиминацијата на македонските Евреи за време на Втората светска војна.
„Интересот на претседателот на Република Северна Македонија за историјата е за пофалба, но тоа што ќе се каже треба да се заснова на историска вистина, а политичарите кај нашиот сосед сѐ уште им ја должат на своите граѓани вистината за сопствената историја. Историја која со децении е обвиена со манипулации и фалсификати“, рече Радев додека присуствуваше на церемонијата на доделување на наградите на Бугарскиот форум на бизнис лидери, пренесува МИА.
Останува нејасно дали бугарскиот претседател под „историја обвиена со манипулации и фалсификати“ мислеше и на депортирањето на македонските Евреи, за чија судбина светската историја јасно ја има признаено улогата на Бугарија.
Претседателот Пендаровски во неделата во обраќањето пред Споменикот во Скопје на 7.144-те депортирани македонски Евреи, изјави дека за да има помирување, треба да има извинување за улогата на тогашната профашистичка влада во Софија за депортацијата.
„Обврзани сме да ги поставиме следниве прашања: дали ние, денешните генерации имаме право да смируваме нечија нечиста совест околу Холокаустот на македонските Евреи? Дали смееме да молчиме пред историскиот ревизионизам што ги рехабилитира злосторниците и ги слави виновниците? Дали треба да заборавиме со чии потписи македонските Евреи беа систематски лишувани од нивните граѓански, економски и човечки права и испратени во смрт?“, праша Пендаровски.
Тој побара извинување од Бугарија за улогата на профашистичката влада во Софија во тоа време во депортацијата на македонските Евреи.
„И во хебрејскиот и во македонскиот јазик изворното значење на зборот правда упатува на она што одговара на вистината. Правда значи да се препознае и именува вистината и таа да биде почитувана од сите. За да има помирување, треба да има извинување за улогата на профашистичката влада во Софија во тоа време во депортацијата на македонските Евреи“, потенцираше Пендаровски.