За прв пат во својата фудбалска историја Македонија е блиску до едно Светско првенство, еден Мундијал на ФИФА. Исланд падна во Скопје, Македонија сама си ја испиша судбината.
Благоја Милевски натпреварот го започна со речиси истите единаесетмина кои ја победија Ерменија во четвртокот, со таа разлика што суспендираниот капитен Стефан Ристовски се врати во составот на местото на Стефан Ашковски, кој патем одлично замени. На голот стандардно Столе Димитриевски, во одбраната Езџан Алиоски лево, Висар Муслиу и Дарко Велковски како централни бекови и капитенот Стефан Ристовски десно. Во средината Елиф Елмас, Тихомир Костадинов и Енис Барди, додека во нападот по крилните позиции искусниот Александар Трајковски и Дарко Чурлинов, а најистурен Милан Ристовски.
Националната арена „Тоше Проески“ во Скопје веројатно распродадена, бидејќи ако не лажат очите, се чини дури и повеќе публика има од оние 50% колку што се дозволени.
Пред самиот почеток македонскиот капитен на својот колега Биркир Бјарнасон му подари македоснки дрес со бројот 105 по повод неговиот 105-ти настап во исландската репрезентација.
Македонските фудбалери одлучно почнаа од самиот старт, притискајќи и барајќи шанса пред голот на гостите од далечниот север.
Уште во 7. минута падна толку посакуваниот гол. Трајковски итро го проигра Алиоски во празно, не беше во офсајд, и од лево ја смести топката во исландската мрежа фаќајќи ја гостинската одбрана неподготвена.
Освен тој гол, конкретни шанси речиси и да немаше во првиот дел. Се играше на средината, со по некоја закана, но без сериозен удар кон двата гола.
Исланд брзо се врати во игра во втотиот дел. Во 54. минута невнимание во домашната одбрана, Бјарнасон ја прати топката на втора статива каде Тоурстеинсон беше оставен сам и лесно го совлада Димитриевски.
Од тој шок македонските фудбалери се опоравија за десетина минути. Барди изведе слободен удар од лево, Оулафсон одбрани, Алиоски потоа шутираше, но беше блокиран. Топката повторно се врати кај него, повторно упати удар, но повторно не стигна до голот. За среќа Елмас ја прими пред голманот и со два потега ја смести во мрежата за ново водство, овој пат од 2:1.
Јоханесон во 79. минута направи фаул над Елмас, а италијанскиот судија му покажа втор жол картон и гостите останаа со десетмина во поле.
На 4 минути пред крајот победникот конечно беше решен. Соло акција на Елмас кој до крај ја изведе завршувајќи во мрежата со помош на подалечната статива.
Очекувано Германија ја совлада Ерменија со 4:1 на гости, додека Романија оствари пирова победа над Лихтенштајн и тоа со само 2:0.
Македонија е во бараж, но работата е далеку од завршена. Жрепката е на 26 ноември, кога ќе го дознаеме првиот противник, како и можните противници во финалниот бараж.
