Ракета Falcon 9, која во 2015 година беше лансирана од SpaceX, ќе удри во Месечината и ќе експлодира.
Станува збор за ракетата Falcon 9 која успешно ја изврши својата мисија, но немаше доволно гориво да се врати кон Земјата, па остана во вселената. Астрономот Џонатан Мекдавел за BBC изјави дека ова ќе биде прв познат неконтролиран судир на ракета и Месечината, но ефектот ќе биде мал.
Ракетата е напуштена во високата орбита пред 7 години, откако успешно изврши мисија на испраќање метеоролошки сателит. Беше дел од програмата на истражување на вселената од основачот на SpaceX, Илон Маск, а со цел колонизација на други планети.
Од 2015 година на ракетата делуваат различни гравитациски сили кои потекнуваат од Земјата, Месечината и Сонцето, поради што нејзините движења се прилично хаотични.
„Таа е мртва, само ги следи законите на гравитација“, вели Мекдавел.
Ракетата се смета за вселенски отпад, машинерија исфрлена во вселената по вршење мисија.
„Во последнните неколку децении настанаа околу 50 големи објекти кои веќе не може да ги следиме. Ова можеби се случило многу пати претходно, но ние не сме го забележале. Ова е првиот потврден случај“, објасни астрономот.
До судир ќе дојде на 4 март, кога ракетата ќе експлодира по контакт со површината на Месечината.
„Во суштина, тоа е празен метален резервоар тежок 4 тони, а ракетниот мотор се наоѓа во задниот дел. Ако замислите фрлање на ова кон карпа со брзина до 1.400 км/час, јасно ви е што ќе се случи“, вели Мекдавел.
По судирот ќе се создаде мал „вештачки“ кратер на површината на Месечината.