Македонската машка ракометна репрезентација вечерва забележа убедлива победа над една од најслабите учеснички на Мундијалот во Полска и Шведска.
По водечкиот гол на Мароканците нашите ракометари полека ја преземаа контролата над резултатот и првото полувреме го завршија со водство од 6 голови разлика, 18:12.
По паузата водството се зголемуваше откако Мароко заглави на 12 голови, а Македонија дојде до +12 (24:12). Потоа некое време резултатот се движеше од 10 до 12 разлика, за на крајот Македонија да ја запише втората победа на овој Мундијал со вкупни 40:25.
Најефикасни на паркетот во Плоцк беа Филип Кузмановски и Мароканецот Мохамед Захер со по 8 голови, еден помалку постигна Петар Атанасијевиќ, додека по 6 постигнаа Ненад Костески и Мартин Серафимов.
Со оглед на што Тунис, како и што се очекуваше, претходно денеска го победи Алжир (30:25) - го завери првото место во групата 2, па Македонија како второпласирана се избори за разигрување за пласман на 27 место. Овој натпревар ќе се игра в среда од 18 часот, а противник ќе ни биде Јужна Кореа, која исто така заврши како втора во другата група 1, зад Чиле, а пред Саудиска Арабија и Уругвај.