Македонската ракометна репрезентација со победа се прости од настапот на Мундијалот во Полска и Чешка каде на крајот оствари пласман на 27. место од вкупно 32 учеснички.
Лошите игри во прелиминарната фаза каде Македонија беше на трипати убедливо поразена допринесе да се натпреваруваме во Президентс купот каде на крајот успеавме да завршиме пред само 5 од 32-те репрезентации учеснички на XXVIII Мундијал на ИХФ.
Вечерва во „Орлен“ арената во Плоцк, Македонија ја совлада Јужна Кореја во борбата за тоа 27. место со 36:33. Македонците добро го започнаа натпреварот и ниту еднаш не им дозволија на Корејците да водат во првиот дел. Водството варираше од 3, 4 и 5 голови разлика, а во еден момент резултатот гласеше и +6 за Македонија (17:11). Сепак, Корејците при крајот благодарение на серијата од 4:0 се изборија за само гол негатива на полувремето (20:19).
По паузата Македонија поведе со 3 разлика, но потоа Корејците во два наврата израмнуваа, а по вториот и поведоа со 26:25, што беше нивно прво водство на овој дуел. Потоа се играше гол за гол, а водството наизменично се менуваше. Така беше сѐ до последните 5-6 минути кога Македонија поведе со 31:30, а до крајот го имаше резултатот под контрола за на крајот да триумфира со 36:33.
Најефикасни на паркетот, со по 8 голови, беа Филип Кузмановски и Џин Јусун, но Кореецот имаше 100% ефект бидејќи од 8 обиди осумпати погоди. Во нашиот табор 6 гола постигна Ненад Костески, 5 Мартин Серафимов, а по 4 Филип Талески и Иван Џонов.
Прелиминарна фаза
Група Ф
Македонија - Норвешка 27:39
Македонија - Холандија 24:34
Македонија - Аргентина 26:35
Президентс куп
Група II
Македонија - Алжир 40:25
Македонија - Тунис 28:33
Македонија - Мароко 40:25
Натпревар за 27. место
Македонија - Јужна Кореја 36:33
Конечен пласман (без првите 8):
9. Хрватска
10. Словенија
11. Србија
12. Исланд
13. Португалија
14. Холандија
15. Полска
16. Бахреин
17. Бразил
18. Црна Гора
19. Аргентина
20. САД
21. Белгија
22. Катар
23. Зелен 'Рт
24. Иран
25. Чиле/Тунис
26. Чиле/Тунис
27. Македонија
28. Јужна Кореја
29. Саудиска Арабија
30. Мароко
31. Алжир
32. Уругвај
