Поради проблеми со летот на релација Порто-Франкфурт, екипата на Вардар 1961 остана во Португалија и ги пропушти врзаните конекции до Белград и Скопје за враќање дома по дуелот од Лигата на шампионите.
Наместо вечерва, екипата би требало утре да тргне од Порто и преку друга конекција да стигне до Скопје.
Вардаровите ракометари денеска не успеале да заминат со авионот од Порто, откако службениците од авиокомпанијата со која требало да летаат ги информирале нашите претставници дека поради новите ковид-правила што се воведени во Германија доколку заминат за Франкфурт ќе мора да бидат ставени во карантин. Дури и ако се работи за транзитирање и не се напушта аеродромската зграда.
Екипата ги имала сите подребни документи за патување, а пред заминувањето од Португалија биле направени и PCR тестови со цел да има не постари од 48 часа. Но, и покрај сите потребни документи од авиокомпанијата не добиле дозвола да се качат на авион и да заминат за Франкфурт.
За проблемите во Порто со авионските врски информирани се и во ЕХФ, и заедно се бара начин екипата што побрзо да се врати во Скопје и да се подготвува за следниот дуел со Флензбург.
Среќа во несреќа е што ЕХФ штотуку го одложи дуелот со ПСЖ кој требаше да се игра во вторник. Канцеларијата на ЕХФ го информираше Вардар дека од Француската ракометна федерација добиле известување за нови рестрикиции што ги вовела државата за лицата што не се од Европската Унија (задолжителен карантин при пристигнување).
Новите правила се на сила до неодреден датум и поради тоа нема шанси да се одигра натпреварот од Лигата на шампионите во Франција. ЕХФ и клубовите ќе се договорат за нов можен датум за одигрување на натпреварот.
