Македонската женска ракометна репрезентација со трета победа го завери првото место во квалификациската група откако денеска ја совлада и Грција со 20:19.
Првото полувреме им припадна на грчките ракометарки кои го добија со 13:10 откако од почеток на натпреварот ја одржуваа предноста. Во еден момент дури поведоа и со +4.
По паузата Македонките ја презедоа иницијативата, направија пресврт и до крај се играше гол за гол. Многу потешко од очекуваното триумфиравме над аутсајдерот во групата, но тоа веројатно беше поради заморот, а и поради фактот што веќе имавме заверено место во баражот.
Најефикасна на паркетот во „Борис Трајковски“ беше Сара Ристовска со 10 голови, додека кај гостите тоа беше Марија Хаѕипарасиду со 6 голови. Една од најзаслужните за победата е и голманката Јована Мицевска која одбрани 9 удари меѓу кои и последниот за израмнување.
Вечерва се игра последниот натпревар од групата помеѓу Исланд и Литванија, натпревар во кој во меѓусебен дуел ќе се одлучи кој ќе биде вториот патник во баражот. Двете репрезентации загубија од нашата селекција, а ја совладаа Грција.
Табела:
- Македонија 6 (75:57)
- Исланд 2 (48:43)
- Литванија 2 (48:57)
- Грција 0 (64:78)
Македонија ќе игра во баражот за пласман на Мундијалот во Шпанија. Жрепката е утре, а противник ќе ни биде една од Германија, Полска, Русија, Словенија, Србија, Унгарија, Црна Гора, Чешка или Шведска.