Рама со критики за самитот за климатските промени: Што правиме тука? Јадеме, пиеме и се фотографираме

Албанскиот премиер Еди Рама остро го критикуваше самитот за климатските промени COP 29 во Баку и се прашуваше која е смислата на меѓународните преговори за климата доколку најголемите загадувачи не го променат своето однесување.

„Луѓето таму јадат, пијат и се фотографираат. Ова ми изгледа како она што се случува секој ден во светот. Животот продолжува со старите навики, а нашите говори – полни со убави зборови за борбата против климатските промени – не менуваат ништо“, рече Рама, пишува The Guardian.

Рама укажа на вчерашната изјава на генералниот секретар на ОН, Антониу Гутереш, кој посочи дека емисиите на јаглероден диоксид се зголемени од последниот самит на COP.

„Што значи за иднината на светот ако најголемите загадувачи продолжат како досега. Што, всушност, правиме на оваа средба повторно и повторно ако не постои заедничка политичка волја да се премине од зборови на дела и да се постигне единство за вистинска промена“, праша Рама.