Тренерот на Нант Клаудио Раниери ги понуди своите услуги и јавно се препорача како решение за празното место на клупата на репрезентацијата на Италија.
Искусниот 66-годишен Италијанец, роден во Рим, сака да седне на клупата на „Азурите“ после дебалкот и неиграњето на Мундијалот во Русија по цели шест децении, поради што Џанпјеро Вентура доби отказ.
„Моментално сум тренер на Нант. Да се биде селектор на својата земја е нешто единствено и прекрасно. Би ми била голема чест, но тоа е прашање за претседателот на Нант, не за мене. Што би направил во репрезентацијата? Би ја подмладил, би биле подготвени за Европското првенство. Имаме многу млади, талентирани играчи, како што на пример е Инсиње“, изјави Клаудио Раниери.
Раниери се наоѓа во подолгиот список на кандидати за селектор на националниот тим, покрај Карло Анџелоти и Манчини.
Пред само година и половина Раниери го предводеше Лестер до сензационалното освојување на титулата првак во Англија.
Искусниот фудбалски експерт покрај тој огромен успех зад себе има долга кариера во која беше ангажиран во Наполи, Фиорентина, Валенсија, Атлетико Мадрид, Челзи, Јувентус, Рома, Интер, Монако и репрезентацијата на Грција.
Сигурно дека Раниери би можел да биде решение за Италијанците, земајќи го во предвид неговото искуство, но и неговата подготвеност, па останува да видиме што ќе одлучи Сојузот, кој прво ќе мора да добие нов претседател после оставката на Карло Тавекио.
