Поранешниот агент на Виктор Осимхен изјави дека играчот до толку не сака да чуе за преселба во Италија што би одбил дури и Јувентус да му понудел 10 милиони евра по сезона.
Нигерискиот голгетер најверојатно ќе биде нов играч на Наполи. За трансферот од Лил се чека само официјализација, а во меѓувреме неговиот поранешен агент, Жан-Жерар Беноа Чајка, откри дека играчот не сакал ни да чуе да се пресели на Чизмата.
„Да бидам искрен, Виктор не сакаше да оди во Италија. Ми рече дека проблемите со расизмот го плашат и дека не чувствува дека треба да оди таму. Некаде во март-април ми рече: 'Не сакам да играм во Италија па макар и Јувентус да ми понуди 10 милиони евра по сезона'“, изјави Чајка за France Football.
Осимхен има 21 година и минатата сезона настапуваше за Лил каде на 38 натпревари постигна 18 голови во сите натпреварувања. Претходно играше за белгиски Шарлроа, а во прв клуб во Европа му беше Волфсбург. За репрезентацијата на Нигерија има 4 голови на 9 натпревари.