Пратениците од ВМРО-ДПМНЕ побараа прекин на расправата во Собранието за разрешувањето на јавниот обвинител Марко Зврлевски во 18 часот за да одат на слава.
„Пола од пратениците седат на штрек и чекаат да одат на слава денеска на Свети Петар, утре на Свети Павле. Бараме да ја прекинете седницата за да одиме на овие големи христијански празници и да ги испочитуваме. Исто како за ифтар вечерата за рамазанскиот пост”, рекоа координаторите Илија Димовски и Антонио Милошоски.
„Има закон за празниците и таму стои кои празници се неработни. Има 120 пратеници, 120 слави и имендени. Вака воспоставувате практика секој за свој именден утре да бара прекин на седницата. Со сиот почит кон верските празници, може секој да оди и да слави”, рече спикерот Талат Џафери.
По силните дофрлања Џафери сепак попушти и ја презакажа седницата за утре.
„Штом не сакате да работите, еве тука ја прекинувам седницата“, рече Џафери, барајќи славите да не станат практика за прекинување на пленарните седници.